Ohikoak diren hiri hondakinen edukiontziak herriko 12 gunetan jarriko dira, eta irekiak izango dira. Materia organikoarentzat, lehen bezala, poltsa konpostagarriak erabiltzen jarraitu beharko da, eta banaketa udalak egingo du. Banakako zein komunitateko autokonpostajeak lehen bezala jarraituko du. Zalantzak argitzeko, ingurumen teknikaria udal bulegoetan izango da astelehenero.

Hondakin berezientzako edukiontziak kokaleku berdinetan mantenduko dira: sukaldeko olio erabiliarentzat Pello Arrese kalean, oihalak, oinetakoak, elektrotresna txikiak, jostailuak, … beti ere bakoitza bere poltsan, Kale Nagusiko edukiontzian.

Azken urteetan herriz-herri emandako pausoei esker, eskualde honek egin duen aurrerapena apartekoa izan da. 2012ko %26tik 2014ko %62,5era eraman dugu birziklapen tasa. Datuak irauli izanaz gain, herritar sentsibilizatu eta arduratsuok osatzen dugun eskualdea garela konturatzeak ematen digu poza.

Arlo ekonomikoan, Tolosaldeko Mankomunitateak ez du zorrik. Kudeaketa hobe bateranzko aldaketa egin dugu eta herri bakoitzak duen bilketa zerbitzuaren arabera ordaintzen dio Mankomunitateari. Era berean, herri bakoitzak berak kudeatzen ditu hondakinen tratamendu gastuak eta birziklapenaren ondoriozko diru sarrerak.

Eskualde osasuntsu batean bizitzeaz harro egoteko moduan gaude. Etxe bakoitzetik hasita egin dugun ahalegina emaitzak ematen hasia da, eta etorkizun oparoa dugu aurretik.

TOLOSALDEKO MANKOMUNITATEAREN ZERBITZUAK:

-Garbiguneak:

Bertara eraman behar diren hondakinak: Obra hondakinak, egurra, inausketa, etxetresna elektrikoak, txatarra eta metalak,  plastikoak, neumatikoak, bolumen handikoak, etxeko hondakin arriskutsuak…

Tolosako garbigunea: San Blas auzoa, 9. 689 41 13 49 sanblasgarbigunea@tolosaldekomankomunitatea.eus
Andoaingo garbigunea: Leizotz industriagunea. 943 30 38 09 andoaingarbigunea@tolosaldekomankomunitatea.eus
Ordutegia: Astelehenetik ostiralera: 9:00-12:30 / 16:00-19:00; Larunbatetan eta abuztuan: 9:00-13:30

• Hildako animalien (untxiak, oilaskoak..) barrunbeak jasotzeko edukiontziak jarri dira ditugun bi garbiguneetan.

-Hondakin arriskutsuentzat edukiontziak herrietan:

Hondakin arriskutsuak: Aparatu elektriko eta elektroniko txikiak, kotxeko bateriak, CD, DVD, VHS, merkuriozko termometroak, pilak, erradiografiak, Aerosol beteak, disolbatzaile eta garbiketako produktuak, tinta eta tonernkartutxoak, margoak, brotxak, motor olioa, fluoreszenteak, kontsumo baxuko bonbilak eta halogenoak.

Garbigunera joan beharrik gabe, hondakin arriskutsuak udaletxeetan jarritako edukiontzietara eraman daitezke. Andoain (Tren geltokian), Ibarra (San Inazion), Tolosa (Emeterio arresen) eta Villabonan (kiroldegiaren ondoan), berriz, etxolak jarri dira.

-Bolumen handiko hondakinak:
Gogoratu, herri bakoitzak bere egutegia duela traste zaharrak, altzariak… ateratzeko. Aurrez, 943 67 62 16-ra deitu edota www.tolosaldekomankomunitatea.eus web orriaren bidez abisatu behar da.
Tolosaldeko Mankomunitatea / Plaza zaharra 6, Tolosa / 943 676216/ info@tolosaldekomankomunitatea.eus

Tolosaldeko Mankomunitateak Kutxa Egonuearekin batera, Etxeko Ura kanpaina abian jarri dute Tolosaldeako iturriko uraren erabilera bultzatzeko asmoz. Ekimen honek helburu hirukoitza du: uraren kalitatea bistaratzea, plastikozko botilako ura kontsumitzeak sortzen duen inpaktua gutxitzea eta kontsumitzaileak kontsumo kontziente baterako bidean jarrera aldaketak barneratzea.

Etxeko Ura ekimenaren asmoa Gipuzkoako iturriko uraren kontsumo kultura berri bat zabaltzea da eta horretarako, datozen asteetan beirazko ur pitxar berrerabilgarriak banatuko dira kanpaina honetan parte hartzeko interesa azaldu duten ostalarien artean.

Honela, ostalariek iturriko ura aprobetxatuz kalitatea eskeiniko dute baina aztarna ekologikorik gabe. Gainera, bezeroek etxetik kanpo uraren kontsumo ohiturak berritzea lortuko dugu kanpaina irauten duen denbora tartetik harago.

Tolosaldeko Mankomunitateak, kanpaina honen bidez beste bultzada bat eman nahi izan dio eskualdean egiten ari den lanketari. Herritarren sentsibilizazioa gakoa da hondakinen kudeaketa egoki bateranzko bidean, eta arrandegietako tupper kanpainak bezala, ur pitxarren kanpaina honek ere lagunduko duelakoan gaude. 

Abaltzizketa, Aduna, Albiztur, Alegia, Alkiza, Amezketa, Andoain, Anoeta, Asteasu, Baliarrain, Belauntza, Berastegi, Berrobi, Bidegoian, Elduain, Hernialde, Ibarra, Ikaztegieta, Irura, Larraul, Leaburu, Lizartza, Orendain, Orexa, Tolosa, Villabona eta Zizurkileko udalek eskerrak eman nahi dizkiete kanpainan parte hartzen ari diren eskualdeko establezimenduei, eta herritarrak eta bertako familiak animatu nahi dituzte taberna edo jatetxeetan iturriko ura eskatzera, bizitza kalitatean hobetu eta ingurumenaren hobekuntzan aurrera egiteko, norbanakoaren konpromisoa ezinbestekoak baitira.

Garbigunera eraman behar izaten diren hondakin mota hauen kudeaketa ahalik eta egokiena izan dadin, herritarrei erosotasunak ematea da gakoa. Hala, iazko maiatzean Andoainen, Villabonan eta Tolosan, ipini genituen etxola hauek. Eta emaitza bikainak eman dituztenez, Ibarran ere modu berean kudeatzeko aukera emango zaie herritarrei.

Modu honetara, herritarrek eskuragarriago izango dute hondakin mota hauek eramateko gunea, eta horrek erabilera handituko duela aurreikusten da. Era honetara, gehiago izango dira tratamendu egokia jasoko duten hondakin arriskutsuak. Ibarran, San Inazio auzoan kokatu da gaur, aipatutako etxola. Era honetara, Ibarrako herritarrei

Mankomunitatea osatzen duten gainerako udalerrietan, oraingoz etxolarik ez dugu jarri, baina guztietan eman nahi denez soluzioa, Udaletxe guztietan jarriko dira tamaina txikiko hondakin arriskutsuak uzteko kaxak. Dagoeneko badaude Udaletxe batzuetan, baina guztietan jartzeko ahalegina egingo da. Garbigunera eraman beharreko hondakin mota hauei herritarrek tratamendu egokia emateko aukera zabaltzea da Udaletxeetan jarritako kaxa horien helburua.

Hondakin mota honi arriskutsu deitzeak adierazten duen moduan, kudeaketa egoki bat gabe, ingurugiroarentzat zein osasunarentzat oso kaltegarri izan daitezkeen hondakinei beharrezko tratamendua ematea dugu helburu, eta bermatzen ari gara etxola hauen bidez geroz eta gutxiago direla zabortegietara bideratzen diren hondakin arriskutsuak.

Honakoak dira etxola hauen bidez biltzen diren hondakin berezi eta arriskutsuak:

• Aparatu elektriko eta elektroniko txikiak: batidorak, plantxak,  patrikako telefonoak, ordenagailuetako teklatuak…
• Kotxeko bateriak
• CDak eta DVDak
• VHS bideo zintak eta musika kaseteak
• Merkuriozko termometroak (plastikozko poltsa itxietan)
• Pilak: alkalinoak, botoi-pilak eta bateria txikiak
• Erradiografiak
• Aerosol beteak edo erdi beteak
• Disolbatzaileak eta garbiketako produktuak (ondo itxitako ontzietan, isuririk egon ez dadin)
• Tinta eta toner kartutxoak
• Margoak eta brotxak (ondo itxita)
• Motore olioa (plastikozko bidoietan eta ondo itxita)
• Fluoreszenteak, kontsumo baxuko bonbilak eta halogenoak

Etxolek, zulo desberdinak dituzte herritarrek dagokion lekura botako dituztelarik  hondakin arriskutsuak. Horretarako, zulo bakoitzak forma desberdina du eta irudi zein testu bidez lagundurik egongo dira guztiak. Biltzaileak etortzean dagoeneko kaxetan sailkatze lana egina izango da eta ondoren, gai bakoitzari dagokion tratamendua ematera bideratuko ditu kudeatzaileak

Tolosan San Blasen dagoen Garbigunea eta Andoaingo Leizotz industriaguneko Garbigunearen bidez ere kudeatzeko aukera badago aipatutako hondakin arriskutsuak baina etxola hauen bidez, zerbitzua eskuragarriagoa jartzea dugu helburu.

Gaurkoan bereziki ibartarrei baina, baita eskualdeko herritar guztiei ere adierazi nahi diegu, oso garrantzitsua dela guk sortzen ditugun hondakinei kudeaketa egokiago bat emateko aukera badugu, ematea. Errefusarekin nahasten badugu, arriskuan jartzen da ingurumena eta biztanleen osasuna. Herritarrei aukerak zabaltzea da helburua, guztion artean ahalik eta kudeaketa egokiena emateko hondakin mota hauei ere. 

2014 urtean, Mankomunitatearekin herrietan emandako aldaketak hauek izan dira:  urtarrilean, ikaztegietan atez ateko bilketa jarri zen, apirilean, Ibarran eta azaroan Tolosako edukiontzi bilketa eraginkorrago bat jarri zen martxan. Gainera, dagoeneko landa eremuko herri guztiek euren organikoa herrian bertan kudeatzeko lanak aurrera eramanak dituzte. Industrian, berriz,  bilketa zerbitzua zabaldu dugu, eta plastiko industrialaren bilketa ere eskaintzen da gaur egun.

2014an emandako pausoek aldaketa nabaria eragin dute eskualde honen hondakin kudeaketa datuetan. Hala, aipatutako aldaketa guztiak burutuak zeudela, 2014urteko abenduko datuak azalduko dizkizuegu. 

Abenduan, eskualdeko etxeetan %62,8-ko birziklapen datu bikaina lortu dugu. Herritarrak zoriondu eta txalotzekoa zalantzarik gabe.

Pausoka pausoka, bidea egiten joan gara azken urteetan, eta alde ederra egin dugu! Aldaketa nabarmenak eman dira, eta aldian aldiko jauzi kualitatiboak bereizi ditzakegu. Azkena, Tolosak eman duena izan da, bere biztanleria handiaren ondorioz, eskualdean eragin nabaria izan duena.

Jarraian, Gemma Eceiza teknikariak datuak desglosatu ditu:

Mankomunitatea, osatzen duten 28 herriek duten bilketa zerbitzuaren arabera sailkatzen ditugu: Atez ateko bilketa duten herriak alde batetik, eta edukiontzi bidezko bilketa dutenak bestetik. Guztietan, etxeetako hondakinak, arropa eta olioaren edukiontziak, kale garbiketa eta sortzaile berezien hondakinak daude kontabilizatuta.

-Atez ateko bilketa duten herriak 7 dira eskualdean, eta 2014an %76,9eko media lortu dute.

-Edukiontzi bidezko bilketan, gainontzeko herri guztiak elkartzen dira. Baina hemen, landa eremua, Andoain eta Tolosa arteko desberdintasunak egingo ditugu.

-Tolosaren kasuan, azarotik organikoa biltzen da, eta edukiontzien irekiera kopuruak erregulatuta daude bilketa sistemaren eraginkortasuna bilatuz. Hala, %76,5 birziklatzea lortu dute abenduan tolosarrek.

-Landa eremuan, 19 udalerri ditugu eta organikoa herrian bertan kudeatzeko ahalegina egiten dute. Herri bakoitzak bere erara ditu moldaketak eginda eta bilketa bateratua dutenez, emaitza ere bai, landa eremuan hondakinen %58,5-a birziklatzera bideratzen da.

Baina kopuru horri, aurrez aipatu bezala, herrian bertan kudeatzen duten organikoa ere gehitu behar zaio, bertan birziklatzen baitute. 2778 familia konpostatzaile daude, 600 mila kilo urtean konposta bidez kudeatzen dituztelarik. Kilo guzti horiek sistematik kanpo geratzen dira, beraz kostuak ere murriztu egiten dituzte udalerri horiek. Kilo asko dira modu honetara kudeatuak, baina eskualdeko datu orokorretan ez daude sartuak, hala balitz, eragin handia izango lukete.

Azken hilabeteetako beste lan bat, karakterizazioena da, eta bereziki landa eremuko herriei lagunduko die honek. Euren errefusean zer doan karakterizatzen dute lan hauek, eta beraz, kudeaketaren balorazioa egiteko ahalmena izaten ari da herri bakoitza. Egoera ezagutu ondoren, hobekuntzak egiteko aukera izanez. Karakterizazio hauen ondorioak ikustean, herrien arteko desberdintasunak sumatzen dira. Izan ere, errefusean organiko gutxiago edo gehiago agertzen da, eta hori, bilketa sistemaren ezaugarrien araberakoa izaten da. Hala, errefusaren edukiontzia mugatuta duten herri batean, organikoaren kudeaketa egokiago bat egiten da. Errefusean organiko kopuru txikia eta finean, benetan birziklatu ezin diren hondakinek osatutako errefusa izaten da.

Hemendik aurrerako, lanketa desberdinak eremu honetan zentratuko dira, bilketa sistema hauek oraindik margena ematen baitute emaitza hobeak lortzeko aukera izanez.

-Azkenik edukiontzi bidezko bilketan Andoain dugu. Andoainen ez da organikoa bereizita jasotzen, eta abenduan, Andoaingo hondakinen %32,8-a izan zen birziklatua.

-Industriaguneetan ere hobekuntza lanak egin ditugu azken hilabeteetan. Enpresa bakoitzaren beharren araberako bilketa eskaintzen zaielarik gaur egun. Hala, egurra, papera eta kartoia, errefusa eta plastiko industriala biltzeko zerbitzua eskaintzen zaie. Era honetara, industriaguneetako birziklapen datua %55,7 izan zen abenduan.

-Eta azaltzeko geratzen zaigun beste adarra, garbiguneko datuena dugu. 2013ko urrian Andoaingo garbigunea ere martxan jarri genuenetik, bi gune ditugu eskualdeko biztanleek euren hondakin berezi horiek eramateko. Bi garbiguneen bidez, 2014ko abenduan %52,8 birziklatzea lortu dugu. Erabilera datuei begiratuta, gremio eta herritarren artean, 20.000 bisita inguru jaso dituzte garbiguneek urte osoan zehar. Garbiguneak erabiltzearen garrantzia azpimarratu nahi dugu, berezko bilketan sartzen ez diren hondakinek kudeaketa egokiena jasotzeko bidean, herritarren parte hartzea oso garrantzitsua baita gbertara eramanez hondakinak.

Amaia Azkuek adierazi bezala,  datuetan nabaria da azken urte honetan ere aldaketa egiten jarraitu dugula. %62,8 birziklatzera bideratu dugu eskualdean, Europako Zuzentarauak 2016rako jarritako helburuak dagoeneko beteta ditugu Tolosaldean. Beraz, eskerrik asko herritar guztioi! Gipuzkoako lehen postuetan kokatu gara, eta hori herritarrei esker bakarrik lortzen da.

Baina 2014an bakarrik ez dira eman aurrerapausoak. Gure eskualdean, azken urteak oso garrantzitsuak izan dira hondakinen bilketa eta kudeaketa hobe baten bidean, eta horrek, emaitzak ematen dituela nabaria da.

Azken lau urteetako datuak konparatzen baditugu, alde ederra egin dugula nabari da. 2011, 2012, 2013 eta 2014ko datuak hartu, eta ondo egiten ari garela ikusten da. Etxeetako hondakinak hartuta kontuan, 2011an, %24a bideratzen zen birziklatzera, eta urtean, biztanleko 353kiloko hondakin sorrera zegoen. 2012an, %26ko birziklatze datua, eta biztanleko urtean 345 kiloko sorrera. 2013an, %32ra igo zen birziklatzen genuena eta biztanleko 315 kilo hondakin sortzen genituen urtean. Iazkoan, %45eko birziklatze media dugu, eta biztanle bakoitzak 300 kiloko hondakin sorrera izan dugu.

Birziklapen datuari begiratuta, 2011koarekin konparatuta, portzentaiak %87ko igoera izan du.

Kilo kopuruari dagokionez, %15 gutxiago sortzen dugu. Zoriontzekoa hau ere, era honetara, bilketa maiztasuna jaitsi baita eta gutxiago sortzean, tratamentu gastuak ere murriztu baitira.

Hondakinen sorrerak izandako jaitsiera hau, ezpairik gabe, prebentzio neurrie esker gertatu da, konpostajea izanik protagonista nagusi. Baina prebentzion kokatze ditugu ere, martxan dagoen tupper kanpaina zein aurten egitekoa dugun ur pitxarren kanpainak.

Datozen hilabeteetan baita ere, hondakin arriskutsuen bilketa herri guztietara zabaltzea aurreikusita dugu. Herritarrengandik gertuago kokatuz gabirguneetako zerbitzua.

Hasieran aipatu bezala, iazkoan emandako aurrerapauso guztiekin, gaur hemen azaldu dizuegun 2014 urte amaiera hori izango da 2015erako abiapuntua. Abiapuntua, goranzko joera izatea baita aurreikuspen hoberena. Horregatik, lehen Tolosari eskua luzatzen genion bezala, gaur Andoaini luzatu nahi diogu, euren organikoaren bilketari ekin eta hondakinen kudeaketa egokiago batekin, bertako zein eskualdeko datuok iraultzen jarrai dezagun. Orain artean bezala, Mankomunitatetik bidelagun izango gaituztela adierazi nahi dugu, hondakinen gestio hobeago bateranzko bidean.

Izan ere, eskualdeko herri guztiek, euren herri programetan aipatzen zuten bezala, hondakinen kudeaketa egokiranzko bidea hartu dute azken urteetan. Hasieratik, eskualde bezala, herrietatik eta herritar arduratsuekin batera eman den aldaketa izan da. Argi baikenuen, beste batzuen eskutan, beste azpiegitura mota batzuen bidez, arduragabe jokatuta, ez genuela halako emaitza onik lortzerik, eta gainera, gure ingurumena, osasuna zein ekonomia hipotekatuko baitziren hala egin ezkero.

Azken emaitza hauekin, eskualdetik eta arduraz jokatzeak izan dituen onurak berresten ditugu. Gure ondorengoentzako eskualde eta Gipuzkoa osasuntsuago bat eraikitze bidean pauso handia eman dugu eta beraz, herritarrei zorionak eta eskerrak ematea bakarrik geratzen zaigu. Eurei esker ari baikara eskualdea aldatzen, ingurumenarekin errespetua duen eskualdea garela erakusten ari gara, ohiturak aldatu ditugu eta hobeak hartu ditugu. Harro egoteko moduko datuak ditugu, eta hemendik aurrera, sistema bakoitzaren eraginkortasuna bilatzea izango da bidea.

Pausoka, pausoka bidea egiten joan gara, eta eskualde berde berde batean bizitzea lortzen ari gara. Arduraz jokatzen duten biztanleok osatzen dugu eskualde hau, eta guztion artean alde ederra egin dugu! Bejondeigula!

Hemen, 2014ko datu guztiak ikusteko aukera.

Jarraian, arrandegi bakoitzeko zenbaki irabazleak:

Amaitzeko, zerrenda honetara azken asteetan batu den beste arrandegi baten berri eman nahi dugu, Anoetako Arantxa arrandegia. Abenduko zozketatik aurrera parte hartuko du arrandegi honek, eta beraz, dagoeneko hasia da tupper erabiltzaileei zozketan parte hartzeko boletoak banatzen.

Erabili tupperra eta zorte on guztioi!

ONTZIRATU ZAITEZ! ZENBAKITAN

Kutxa Ekoguneak ekimen hau Gipuzkoako hainbat udalerritan martxan jarri zuenetik, saltokietako jabeei proiektu honek abantailak besterik ez dizkie ematen. Izan ere, talde honen adostasun eta lankidetzarik gabe proiektuaren garapen egokia bermatzea oso zaila litzateke.

Gaur egun tupperraren kanpaina Gipuzkoako 30 udalerritan dago martxan eta horretarako 70.000 ontzi berrerabilgarri banatu dira Ontziratu zaitez! lelopean.

Kanpainaren ondorioz, batez beste 26.000 erosketa egiten dira hilero ontzi berrerabilgarria erabiliz. Honek hilean 145kg paper eta 15.600 plastikozko poltsen aurrezpena suposatu du.

Mankomunitatea osatzen duten herri guztiek dute dagoeneko aurrera daramaten edo eramango duten proeiktua esku artean. Herri bakoitzaren izaera edota ezaugarriak direlata, bakoitzak bere eredua garatu du.

Eskualdean gauzak hain garatuak izateak, eredu desberdinen araberako bilketak egitea ahalbidetzen digu. Hala, orain artean ez bezala, orain bilketa sistemeka banatuta, herrien datu errealagoak eskuratzeko aukeran gara.

Mankomunitatearen lan ildoak prebentzioari pixu handia eman izan dio azken urteetan. Hala, materia organikoa konpostajearen bidez kudeatu eta bilketa sistematik at jartzea izan da gakoa.

Prebentzioari ematen diogun garrantzi hori, emaitzak ematen hasia da dagoeneko: Iazko lehen 5 hilabeteak hartu eta aurtengo lehen bost hilabeteekin konparatzen badugu, 650 tona hondakin gutxiago sortu ditugu eskualdeko etxeetan; pertsonako 80 gramo egunean. Hori, konpostajeari esker, krisiaren ondoriozko kontsumo jaitsierari eta kontsumo arduratsuagoko ohiturak ditugulako izan dela uste dugu.

Konpostajean jarri dugu orain arte indar handiena, eta emaitzak oso onak izaten ari dira. Eskualdean, banakako, bizilagunen arteko zein auzo konpostajea egiten duten 1800 familia inguru baitaude. Horretarako, Mankomunitateik 1200 konpostagailu banatu ditugu.

Mankomunitateak eskaintzen dien zerbitzuaren arabera, gaur gaurkoz 3 taldetan banatzen ditugu eskualdeko udalerriak:

Alde batetik, landa eremuko herriak ditugu. Eskualdeko 19 udalerrik osatzen dute lehen multzo hau. Herri hauen bilketa, bateratua da dagoeneko eta Zero zabor izaeran lanean ari dira, euren organikoa herrian bertan kudeatuz eta errefusa ere kontrolpean izanez.  Dagoeneko 15ek hartu dute bide hau eta aurreratzean, gainerako herriek ere bide bera hartuko dute.

 Azken hilabeteetako datuak ikusita, %55,7an kokatzen da euren birziklapen tasa. Baina materia organikoa guztia herrian bertan kudeatzen dutenez konpostajearen bidez, birziklatzen den kopuru horri gehitu beharko genioke zabortegira bideratzen ez den kopuru hori ere. Era xume batean, azpiegitura handirik gabe eta herritarren arduraz egindako lana da hau, eta benetan eskertu eta zoriontzekoa dela deritzogu. Eskualde osoko biztanleriaren %14,3a izanagatik ere, 19 udalerri dira eta beraz, eskualdearen parte garrantzitsua osatzen dute.

Konparaketa interesgarria, landa eremuko herrietan konpostajearen lanketa egin aurretik eta egin ondoreneko datuena. Karakterizazio horretan, errefusaren edukiontzien edukia biltzen da astebetean zehar, eta bertan dauden hondakinen sailkapena egiten da. Argi denez, Larraulgo kasuan, oraindik lanketa egiteke zutenean, errefusa ez da beharko lukeena soilik. Birziklatu ahal zitekeen hainbat hondakin ere agertzen baitira. Aldiz, Berastegin jada lanketa egin ondoren egin zen karakterizazio bera, eta ikus daitekeenez, oraindik inpropio batzuk egonagatik ere, errefusera bideratzen den zati handiena, benetan errefusa da. Badago oraindik zer hobeturik (laurdena) baina aldaketa nabaria da ezbairik gabe.

Bestetik, atez ateko bilketa duten herriak ditugu: eskualdean dagoeneko 7 dira atez ateko bilketa eredua dutenak. Eta beraz, euren bilketa bereizia dute.

Alegia, Anoeta, Irura, Villabona eta Zizurkil izan ziren orain dela urtebete eskualdean bilketa berri hau jartzen zuten lehenak. Ondoren, urte hasierarekin Ikaztegieta hasi zen, eta apirilean Ibarra ere gehitu zen eredu berera. Daramaten denbora tarteak desberdinak izanagatik ere, guztiak zoriondu beharreko lana egin dute, eta herritarren lan txalogarriari esker, emaitza paregabeak lortzen ari dira 7 herri hauek.  Azken hilabeteetan (Ibarrak ere parte hartzen duenetik), % 77,7an kokatu direlarik batazbestekoa eginda. Sistema berria ezartzean genituen aurreikuspenak betetzen ari gara, eta markatutako helburuak eskuratzen.

Errefusa, kopuru oso txikira igaro dela nabari dezakegu, lehengo %30aren ingurutik, %22ra jaistea lortu da sistema honen bidez. Organikoa biltzearen garrantzia ere nabaria da, etxeetan sortzen dugun hondakinik gehiena berau baita. Gainera, datu hauek jasotzen ez dituzten kopuruak ere kontutan hartu behar dira; atez ateko bilketa duten herrietako landa eremuan, organikoa norbanakoak konpostajearen bidez kudeatzen du, eta herriguneetan ere asko dira auzo zein banakako konpostagailuak erabiltzen dituztenak.

Aipatzekoa ere, paperaren portzentaia zerbait altuagoa izan beharko lukeela, Villabonako papera eta kartoia ez baitaude jasota datuotan.

Eskualdeko biztanleriaren %31ak, hartzen du parte atez ateko hondakinen bilketa ereduetan, eta aurrerago ikusiko dugun moduan, eskualdeko datuetan eragina du.

Azkenik, bi herri urbano ditugu: Tolosa eta Andoain. Gaur gaurkoz, oraindik hondakinen kudeaketan aldaketa ez dutenez egin, euren bilketa bateratuta dugu eta emaitzek ez dute azken hilabeteetan aldaketa nabaririk izan hauen kasuan; %30,2ko birziklapen tasa dutelarik. Horrek, datu globaletan eragin handia izaten du, eskualdeko biztanleriaren %54a osatzen baitute bi hiri hauek.

Bi hiriekin lanean ari gara eta gure baliabide guztiak euren eskura jarrita ditugu, eurek ere aurrerapenak egin eta hondakinak hobeto kudeatzen hasteko. Tolosaren kasuan, lanak aurreratuak ditugula esan daiteke, eta ikasturte berriarekin sistema egokiago bat martxan jartzeko aukeran izango gara.

Mankomunitateak zerbitzu ematen duen beste eremuak, herriguneetako bilketetatik at geratzen diren industriaguneak eta garbiguneen zerbitzua ditugu.

Industriagune eta enpresetan, birziklapen maila %47,8koa izan dugu urteko lehen hilabete hauetan. Zerbitzu hau, errefusa, kartoia eta egurraren bilketak osatzen dute.

Eta azkenik, Garbiguneek ematen dizkiguten emaitzak ditugu. Andoaingo garbigunea irailean irekita, aurtengo lehen hilabete hauetako datuak iazkoak baina altuagoak izan dira. %41a birziklatzen delarik garbiguneen bidez. Erabiltzaileen datuak ere baditugu; azken 5 hilabete hauetan, 2075 enpresak eta 3300 partikularrek erabili dituzte ditugun Tolosako eta Andoaingo garbiguneak. Bietan dugun berrerabilguneak berriz, 272 lagunek erabili dituzte.

Beraz, orain artean azaldutako datuak hartuta, eskualdean dugun birziklapen maila %42an kokatzen dugu aurtengo urtarriletik maiatzerako tartean. Iazko tarte berarekin konparatuta, diferentzia nabarmena ikus daiteke, orduan, eskualdean sortutako hondakin %35,5a birziklatzen baitzen.

ETROKIZUNA:

 Urtea amaitzerako, sistema desberdinak egonkortuago egongo dira eta Andoain eta Tolosak ere euren bilketa eredua eraginkortuko dutenez, urte amaierarako aldaketa gehiago aurreikusten ditugu. Tolosak, ikasturte hasierarekin batera, aurrerapausoa emango du bere bilketa sistema berriarekin, eta bere 18.500 biztanleek, ziur gaude eragin handia egiteko aukera izango dutela egun ditugun birziklapen zenbatekoetan.

Hurrengo ikasturteari begira jarrita, hainbat proiektu ditugu eskuartean:

Alde batetik, industriaguneei ematen zaien zerbitzua zabaldu eta hobetzeko pausoak emango ditugu. Euren eskaerei erantzunez, plastiko desberdinak biltzeko aukera zabalduko baitugu. Bilgarriak, flejeak, porexa eta plastiko zurrunak biltzeko zerbitzua martxan jartzea aurreikusten dugu udazkenean.

Orain artean bezala, prebentzioari eskutik helduta jarraituko dugu. Hala, konpostajea ezarpen eta jarraipen lanek aurrera jarraituko dute eskualdean. Materia organikoa herrietan bertan kudeatzeak duen garrantzia zabaltzen jarriatu nahi dugu, hondakinen sorrera prebentzioa gakoa baita.

Datorren ikastutean ere, herritarrekin eta herritarrentzat lanean jarraitzea izango dugu helburu. Hondakinen sortzaileak herritarrak geu garenez, erraztasunak eta laguntza eskaintzea gure lana izango da oraingoan ere.  Hala, hondakinen sorrera murriztea eta kontsumo ohitura arduratsuak izateak duen garrantzitsua zabaltzen jarraituko dugu. Tupperren kanpaina, pixoihal berrerabilgarriena zein pitxarren kanpainak garatuz, sentsibilizazioa eta informazioa zabaltzea izango ditugu helburu.

Orain artean bezala, herritarren parte hartzeari emango diogu indarra. Hondakinen sortzaileak direnez, hondakinen kudeaketa egokiak egiteko protagonistak eurak baitira. Herritarrengandik gertu jarraituko dugu, gure baliabideak eskura jarriaz eta laguntza emanez.

Guztion betebeharra da gauzak ongi egitea, eta Tolosaldeak baditu dagoeneko urte pare bat, bide horretatik doala. Hobetze lana besterik ez zaigu geratzen eskualde honetan, perfezkionatzea. Ezarketa gehienak eginak ditugu dagoeneko eta beraz, hauek txukundu zein eraginkorrago bihurtzea izango dugu gakoa. Guztion artean, orain arte bezala, ondo egiten jarraituko dugu.

 Ondo ari gara, eta hobeto egingo dugu. Konfidantza guztia dugu euren kudeaketa hobetu duten eta hobetuko duten herriengan. Aldaketak, ez dira goizetik gauera egiten, esfortzu txiki zein handiak eskatzen dituzte maiz, baina emaitzak balioko digu. Eskualde jasangarriago baterantz goaz, kudeaketa hobea duten herrietarantz, eta guztiok, Tolosaldea zein Gipuzkoa osasuntsuago bat egiten lagunduko dugu. Ingurumenari eta oraingo zein ondorengo gure herritarrei zor diegulako, jarrai dezagun bide eredugarri honetatik.

Elkarrekin, alde ederra egiten ari gara!